سارة كونر اللى فى حياتى

بيعرض حاليا على mbc action مسلسل أجنبى حلو قوى إسمه Terminator , أحداث المسلسل بتدور حول إنتقال بعض الأليين من المستقبل الى الماضى لقتل قائد حركة المقاومة لهم John Conner فى الماضى عندما كان صغيراً و سهل الوصول إليه, و لكن تتصدى لهم والدته Sara Conner مع عم الولد و إنسانة أليه صديقة مش فاكرة اسمها الصراحة, بس مبدئيا أحداث المسلسل من وجهة نظرى بتدور حول الأم الوحيدة الشجاعة المطالبه بحماية إبنها و حماية العالم من خلال حماية إبنها من القتل , و هى وحيدة لإن زوجها قد تم قتله عندما كان John طفلا صغير .

هنلاحظ فى المسلسل ان Sara فى كل حلقات المسلسل مطالبه انها تكون قائدة, متحمله للمسؤولية كاملةً ,جسورة, شجاعة, لا تخاف, ولا تحزن, ولا تشعر بالوحدة لكى تظهر أمام إبنها رابطة الجأش...لكى تمده بالقوة و القدرة على تحمل الصعاب.

جميل قوى....لكن ياترى هل هناك من حاول أن يرى ما بداخل هذة المراءة من مشاعر؟؟؟؟ هى مش ست زى أى ست فى الدنيا..نفسها تتحضن من راجل يحميها و يحمى عيالها ...نفسها ترمى دماغها على صدر واحد حاسس بيها و بهمها و تعبها ...مين قال أنها قوية...مين قال انها ناشفة...دى ضعيفة قوى من جوة ..و كل شوية جرحها و تعبها ووجع صدرها بيكبر و هى ساكتة و شايلة الهم لوحدها ...بتتعب و تمرض و هى بردوا اللى تشيل هم نفسها لوحدها ....مش نفسها مرة تحط دماغها على مخدة و تحس بالأمان و تصحى تانى يوم و يومها يبقى طبيعى زى أى ام و زى أى زوجة ؟؟؟؟

تصحى و تصبح على زوجها بحنية و تقوم و تشوف ولادها صحيو ولا لا ...و تدخل على المطبخ بهدوء و تحضر الفطار عشان تجمع العيلة على طرابيزة واحدة ...مش دى بردوا حياة اى ست طبيعية؟؟

بس ازاى تبقى حياة طبيعية و حياة إبنها فى خطر دائم ... و كل يوم لازم تغير مكان عشان الأعداء ميعرفوش مكانها..و توفر الامان و التعليم و المأكل و الملبس ..لا بجد الموضوع تقيل عليها و هى لوحدها ...ماسكة سلاحها و ساكتة عشان تحمى ابنها اللى بشنطة المدرسة...و الحياة مستمرة و المسلسل مستمر فى حلقاته.

سارة كونر تكون امى و ابنها يكون انا و أخويا و شوفوا انتوا بقى :)

صحيح المثل أجنبى بس اكتر مثل لقيته بيعبر عن الواقع بتاعى

حاجة محدش يقدر يحسها غير اللى جربها و فهمها

ساعات الحب بيملى قلب الواحد لدرجة تحس انك طاير من الفرح و مزقطط كدة .. و بالمناسبة بس ..انا مبتكلمش على الحب اللى بين الراجل و الست ..انا بتكلم على الحب بين الانسان و ربه ...و دة مرتبط اكثر بالرضا
ااااااااااااه ..من الرضا يا جماعه ..سبحان الله يارب ..انا بكتب من خبرتى فى الدينا دى و اللى تعتبر ولا شئ بجد ..بس على قد ما عرفت فى حياتى و عيشت ..مش اى حد يوصل لمعنى الرضا ..لآن الرضا مهما اى حد أعد يكتبلك عليه عمره ما هيعرف يوصلك مدى الجمال و الهدوء و السكينة اللى الانسان الراضى عايش بيه ...

انا لا انا بعمل دعوة ولا بقول يا جماعه اعرفوا الرضا .لآن سبحان الله ..اللى يرضىىىىىى لازم يكون بيحب ربنا ...لاااااااااااااازم يحب ربنا عشان تعرف تستحمل و تسأل نفسك لية ..لآنك لو حبيت حد عمرك عمممممرك ما هتعرف تزعل و تعند معاه ..سبحان الله ..والأهم بقى لازم تعرف حبيبك ..انا اكتشفت انى مكنتش عارفة يعنى اية ربنا ...انا اتولدت زى زى غيرى.. عارفة ان ربنا موجود عشان بابا و ماما قالولى انتى مسلمة ...انما ياترى فكرت او سالت ....لا خالص ..إلا مؤخرا فسبحان الله فقلت لازم اعرف ربنا اكتر و بكل بساااااطة قريت اسماء الله الحسنى لراتب النابلسى ...حاجة بسيطة جدااااااا
..معادلة حلوة قوى لو عرفتها عملتها

حب الله +معرفة الله = الرضا